Kişilərdə cinsi aktivliyin azalması və erektil problemlərin yaranması çox vaxt yanlış olaraq ancaq yaşlanma ilə əlaqələndirilir. Lakin cinsi zəiflik əksər hallarda hormonal mənşəli olur və əsas səbəblərdən biri kimi testosteron çatışmazlığı göstərilir. Testosteron kişi orqanizmində cinsi istək (libido), ereksiya mexanizmi, sperma istehsalı, əzələ və sümük strukturu, həmçinin psixoloji balansın qorunmasında mühüm rol oynayır. Onun səviyyəsinin azalması cinsi funksiyaların pozulması ilə yanaşı, ümumi sağlamlığa da mənfi təsir göstərir.
Testosteron çatışmazlığı (hipoqonadizm) nəticəsində yaranan cinsi disfunksiyalar tədricən inkişaf edir. İlk mərhələdə libido azalması və cinsi marağın zəifləməsi müşahidə olunur. Sonrakı dövrlərdə ereksiya əldə etmə və ya saxlama çətinlikləri (erektil disfunksiya), orqazmın zəifləməsi və eyakulyasiya pozuntuları ortaya çıxa bilər. Bəzi hallarda kişilər bunu psixoloji yorğunluq və ya streslə əlaqələndirir, lakin problemin kökündə çox vaxt hormonal disbalans dayanır.
Uzunmüddətli testosteron çatışmazlığı yalnız cinsi həyata deyil, həm də ümumi orqanizmə mənfi təsir göstərir: əzələ kütləsi azalır, piylənmə artır, sümük sıxlığı zəifləyir və enerji səviyyəsi aşağı düşür. Hormon tarazlığının pozulması eyni zamanda depressiv əhval-ruhiyyə, motivasiya itkisi və diqqət yayınıqlığı kimi psixoloji simptomlara da səbəb ola bilər.
Xəstəliyin diaqnostikası qan analizi vasitəsilə testosteron səviyyəsinin ölçülməsi yolu ilə aparılır. Qan nümunəsi səhər saatlarında götürülür, çünki bu zaman hormonun səviyyəsi ən yüksək həddə olur. Eyni zamanda LH, FSH və cinsi hormonları birləşdirən qlobulin (SHBG) göstəriciləri də qiymətləndirilir.
Müalicə kursu problemin səbəbindən asılı olaraq testosteron əvəzedici terapiya, həyat tərzi dəyişiklikləri və psixoloji dəstək tədbirlərini əhatə edir. Kişilər libido və cinsi aktivlikdə azalma, enerji itkisi və əhval dəyişiklikləri hiss etdikdə bunu yaşla əlaqələndirib gözləməməli, vaxtında müvafiq mütəxəssisə müraciət etməlidirlər. Erkən diaqnostika və müalicə yalnız cinsi funksiyanın deyil, ümumi sağlamlığın da bərpasına kömək edir.
